De Günnegüggel – Famili

Odda : onnaschd wie woannaschda

De Uffbabba vom Günnegüggel is herkumme aus Günnegüggelonie. Odder Günnegüggel-country. Vor samsing raund äbaut ix Johrhunnert-Dezennie.  Un de Günnegüggel hot am Aafang als Hossescheißer noch gesesse uffem Schoß vun seim Uffbabba, dem Owweruffbabba vun alle Günnegüggels.

Herkumme is die Günnegüggel-Ursipp  aus dem sauheiße baklawanische Flach-un Gebirgsterrain hier ins Moffegebiet. Vum Schwitzesunne-Owwerzentrum in die Schlechtwetterzon. Zu denne Malocher-Heinis un Autobahnbaggerer hier. De Diefsinns-Salbaderer. De ehemaliche Hurrah-Schreier un Würge-Engel.

Un kaum hat de klää Günnegüggel krabbele könne, isser schnell ins Muggi-Büdsche geflitzt. Jeden Owend. Ins Muggi-Büdsche vun Monnem. Sisch müd gemüggelt. Fa die Muggis ufzupolschdere un ufzumonschdere. Dasser gut rumstolziere kann zwische denne ganze  Audobahnbaggerer . De Moffekepp. Dassem känna was will. Känna was kann. Un im Muggibudestudio-Foyer hot bal e Bild gehunke mit sime Muggiathlede-Body. Un drunna hat stolz gstanne: Unser Mitglied Günnegüggel. Ja. De Günnegüggel war uf äämol e richtiches Monschter-Muggi-Model. Räpperei-Rhapsod war er außerdem, un Matscho-Dänzer mit Versgeschrei un Reimgedunner un Hopse un allem.

Un so hot en die Heidi gsehe hopse. Die Heidi war blond bis ins Herz. Blondflaumisch bis in de Hinnere nei. Allasses Gott! E Blondi! Un aa noch e Laacher-Kommandante-Enkelsche.

Un im Türke-vor-wienerische Walzertakt hot se aagfange, dem Günnegüggel vun Morgens bis Abends ins Ohr zu flöte:

„Isch will e Baraut-Kaleid-Baraut-Kaleid!   

  En pinkes Baraut-Kaleid-Baraut-Kaleid!“

Un is mit em vun Barautkaleidmode-Lade zu Barautkaleidmode-Lade gesprintet un hot  lauder gewaldich gebauschte Atombarautkaleider aaprobiert, so atomarisch un aromatisch ufgepluschderd unnerum, dass mer am Bauch schun die ganze Schwangerschaftskinnerscher vorausgeahnt hot.

Un bal hats tatsächlich es Heidi Günnegüggel geheiße.

Jetzt könnt mer jo meine, sie hätten sich kulturalisch-moralisch in die Woll kricht un christlamistisch gezofft. Un de alt Günnegüggelvadder hätt sich mit em Heidi-Deutschmacker-Vadder net vertraache. Un es Pärle hätt sich debattelich de Hitler un Armenie un alles um die gepiercte Ohrläppelcher gehaue. Un die jeweiliche Tante hätten sich vielleicht schun bei de Hochzeit die schwarzblonde Kunschtfrisure gejeseitich ausenannergeroppt. Iwwerhaupt hätt alles hinne un vorne nit hiegehaue mit der Bekleidung un de Beschneidung un so. Nach dem Motto:

Erscht die Hochzeitstort.

Dann de Ehremord.

Awwer nää. De Günnegüggel un sei Heidi warn so überglücklisch wie en großes Ü. Un wie es erschte Günnegüggel- Bübsche gebüre, äh, gebore war un es erschte Günnegüggel-Püppsche ünnerwegs, hat er sein eichenes Muggibüdsche ufgemach. Un sie en Barautkaleider-Lade. Ja. Mit Sück un Pück sinse ab. In die Türkei?  Odder wars Thüringe?